今晚意甲獨腳戲，AC米蘭主場迎戰拖連奴。「紅黑兵團」自「瑞典神箭」伊巴謙莫域加盟後明顯翻生，撞正聯賽4連敗嘅拖連奴，必趁機打落水狗，讓一球照捧上盤。

AC於冬季轉會窗免費簽入伊巴謙莫域，更不惜放走年輕前鋒比亞迪克，一度惹嚟質疑。不過「瑞典神箭」用行動證明自己，自佢加盟後，「紅黑兵團」各項賽事錄得4勝4和僅1敗，呢位38歲老將亦有3粒進帳，包括上輪聯賽嘅米蘭打吡，交出入波兼助攻，仲有一球頂中柱，最終雖反輸2比4，但伊巴交足貨，而且AC圍繞佢進攻，唔似得上半季冇晒重心，並打番起列比錫、查漢奴古等中前場球員，其中上半季踢到冇影嘅列比錫，近6仗入5粒兼交出1次助攻，呢點正係伊巴獨有嘅影響力。

另一邊廂，拖連奴踏入2020年後愈打愈差，近4場聯賽輸晒，今仗仲有主力後衞阿曼度艾素坐波監，防守進一步削弱，加上射手比洛迪近5仗聯賽都食白果，實在冇本錢爆冷，讓球盤AC讓到一球咁辣，亦反映出對其信心十足，呢個上盤不容錯過。

今晚英超大戰，車路士主場對曼聯，兩隊都要努力為下屆歐聯入場券而戰。車仔小將經過去年10月、11月嘅蜜月期後，狀態開始起伏不定，真係要套用賭魔陳金城名句：「後生仔始終係後生仔，都係急啲！」曼聯有遇強愈強特性，受讓半一捧下盤。

車路士今季重用新人踢出驚喜，5名22歲以下嘅英格蘭小將譚美阿巴謙、美臣蒙特、赫臣奧杜爾、列斯占士及湯姆利火速上位，成為球隊主力，季初更打出一段6連勝，勢不可當。不過年輕人最大毛病就係水準唔穩定，之後13場聯賽僅贏4場，如果唔係其他主要競爭對手頻頻失分，根本難以保持前4位置。

車仔戰績低沉嘅主要原因，係射手譚美阿巴謙入球率下滑，加上基斯甸普列錫養傷冇咗個好幫手，畢竟後備前鋒巴舒亞伊及基奧特喺聯賽加埋都只係入咗1球。若果阿巴謙啞火嘅話，車仔嘅進攻可謂頓失支柱，不幸嘅呢位箭頭有傷在身，今場仍未確定能否上陣，如倦勤嘅話，對車仔可謂打擊甚大。

目前排第9位嘅曼聯，距離車仔只係相差6分，由於曼城有可能被禁出席未來兩年嘅歐洲賽，如果上訴唔成功嘅話，隨時聯賽第5都有得踢歐聯，對曼聯嚟講絕對係好消息。曼聯喺冬季轉會窗相當積極，羅致咗士砵亭中場波基斯費南迪斯及尼日利亞前鋒恩哈路，雖然兩人嘅作用尚待證明，但起碼前線嘅調動靈活咗好多，為咗爭取出場機會，各人都要更加努力。

其實紅魔今季對前列球隊嘅成績相當唔錯，單計前8名球隊，共踢咗12場僅輸過2場，強如利物浦今季唯一失分嘅賽事就係喺曼聯身上，可見佢哋嘅防反戰術係有一定威力，車仔嘅防線今季出現極多漏洞，連天價轉會費嘅門將阿列沙巴拿加都因表現太差而失去正選，曼聯今仗絕對有機會偷雞。溫馨提示，今晚天氣轉涼，大家睇波時記得着多件衫啦。